(Bundil : April 2010 - 20 Juli 2010)
(bundil pas baru bisa jalan)
bundil... kucing kecil yang kemaren gw ceritain di postingan yang judulnye penghuni rumah, sekarang udah pergi menyusul Penciptanya Allah SWT. si bundil dijemput sekitar jam 12.59WIB pas banget di depan mata gw. ceritanye sebelom mati, si bundil udah dua kali badannye gemeteran sambil jerit-jerit kaya kesakitan gitu. pertama kali yang ngeliat bundil gemeteran itu abang gw, abis itu abang gw pindahin ke tempat tidurnye si jenong di atas guling yang selama tiga hari ini jadi tempat die nyender, soalnye sakit sesak napasnye bikin die ga bisa tidur sama sekali.
pas mau solat zuhur, abang gw nyuruh gw buat ngejagain si bundil. ga lama abang gw solat, si bundil badannye gemeteran dasyat banget, sampe teriak-teriak kesakitan gitu, pas gw pegang kakinye kok udah dingin ama pucat banget pas di bagian telapaknye. yasudah, udah tau begitu, bundil gw biarin aja, soalnya kalo gw pegangin juga ga bakalan ada pengaruhnye. kejadiannye cepet banget, ga lama abis itu, gerakan dadanye bundil tiba-tiba ga seekstrim waktu die sesek napas. pas gw angkat, ternyata badannye udah lemes banget, dan pas gw cek pupil matanye, ternyata udah ga ada gerakan sama sekali (pupil mata kucing sensitif kalo kena cahaya, jadi bentuknye gampang berubah).
Innalillahi wa inna ilaihi rajiun, abis itu gw langsung bersihin sisa belek di matanye dan sisa air liur yang masih ada di pinggiran mulutnye. pas abang gw kelar solat, die kaget pas gw bilang bundil mati dan rada-rada ga percaya gitu. tapi pas die pegang langsung badannye, akhirnye percaya juga.
si goyu ade gw pas gw sms juga ga percaya, padahal pas gw sms gw udah nulis "gw ga bohong", eh die jawab "bohong".
sebenernye sih, tanda-tanda si bundil bakal pergi udah keliatan dari pagi, selama tiga hari sakit, baru hari ini doang die bawel ngeong-ngeong mulu. die baru bisa diem kalo udah dielus-elus palanye. dari semalem juga si bundil udah ga mau makan, padahal biasanye yang paling semangat makan di antara para kucing yang masih kecil ntu die. pas dikasih potongan ikan sama si jenong juga ga dimakan, dikasih susu dimuntahin.
sepanjang pagi ini kondisi penyakitnye makin parah, air liur yang kemaren ga keluar tiba-tiba keluar banyak banget, hampir lima menit sekali gw bersihin pake tisu. selaen ntu, biasanye si bundil bersih pinter banget, kalo mau pipis ataupun buang hajat selalu ke kamar mandi, tapi hari ini die ngompol di kasurnye si jenong.
rencananya si bundil mau dibawa ke dokter sore ini pas si goyu pulang sekolah, tapi ya apa mau dikata, ajalnya si bundil udah ditakdirin hari selasa 20 juli 2010 jam 12.59 WIB.
sumpah, sebenernye gw syok banget ngeliat si bundil meregang nyawa di depan mata gw. pas banget sama ciri-ciri manusia yang lagi meregang nyawa, cuman kalo menurut gw, si bundil termasuk cepet dipanggilnye.
kalo ngeliat si bundil mati aja udah syok, gimana kalo gw ngeliat orang meninggal atau apa yang bakal gw lakuin kalo gw ditempatnye si bundil. pelajaran yang gw ambil hari ini dari kematiannye si bundil, kita ga bakal tau kapan kita dipanggil Yang Maha Kuasa, jadi sebisa mungkin kita harus siap-siap, siap ga siap juga kita bakalan ketemu sama hari terakhir dalam hidup kita masing-masing.
Istirahat yang Tenang ya Bundil, sekarang napasmu udah ga bakal sesak lagi selamanya... T___T
WE LOVE YOU BUNDIL....
Tidak ada komentar:
Posting Komentar